Joeksbend Wortelestamp, 2001  -  2009

 

Ut idee um zoëiets as joeksbend Wortelestamp op te richte, is rond de vastelaovend van 2000 ontstaon. Venlose groepe, zoë as Mooder Hellup en Minsekinder, hadde in ein vér verleeje al verschillende alde Venlose vastelaovesliedjes bewerk en in ein aafwiekend muzikaal jeske gestaoke en det zoel volgens mich ouk motte kinne met Bliérickse vastelaovesliedjes.

Zellef waas ik op det moment nog lid van joekskapel de Nachravers en zoot ik dus dichbeej ein muzikale bron um minse te vinde die mei kôste doon.

As ierste de saxofoniste Wil Verbruggen gevraog. Gezeen ut gegaeve det det met mich getrouwt is, waas nae zegge gèn optie. Trompettis Mark Giesberts veulde waal wat veur deilname en auk Hans Aerts, dae ik as zenger/gitaris op ut aug had, waas auk direk enthoesias. Hans had same met zien broor Marc al verschillende kiere de nummer ein van de blierickse vastelaovesliedjes gescoort, dus ervaring zat.

Toen meus ik nog eine bassis hebbe. Die keuze waas neet zoë moeilik gezeen mien jaorelange vrindschap met Vic Suiker. Ouk Vic had toen al zien spore verdeend as vertolker van de blierickse liedjes. Op vastelaoves-vriedaag stonde Vic en ik gezellig beej kefee Sur Meuse ein pilske te drinke, toen ik um vroog of hae mei woel doon.

Noow wet ein idder: “as d’n drank is in de man, dan zit de wiësheid in de kan”, dus Vic zei volmondig: “jao netuurlijk doon ik mei “ .

In april daoropvolgend ein bespraeking georganiseert, waobeej Vic zich dao niks miër van kos herinnere det ik um überhaup gevraog had, maar hae kwaam gelôkkig toch opdage.

De iërste rippetisies verlépe en dan drôk ik mich nog zaach oet, erg stroef, maar op ein gegaeve moment begôs ut toch onderling te klikke en koste we langzaam maar zeker ein klein rippertwaar van zo’n 10 liedjes opbouwe. Doordet weej onder de rippetisies zellef de arrangemente verzonne, waas ut óetzeuke daovan, veural veur de blaozerssectie ein heidens karwei.

 

Op 28 jannewarie 2001 waas ut zoëwiet, weej hadde veur ein klein gruupke minse

eine zoegenaamde “try-out” beej kefee Pontanus georganiseerd en det leep neet verkiërd.

Umdet ôs saxofoniste Wil meus meihelpe met ut organisere van de Nachravers-vastelaovendaovend, waas ut neet zoë moeijlik um dao ôs iërste optreeje te halde.

Auk mochte weej det jaor speule beej ut alleriërste “Blariacum-Baeregood” bal.

De reaksies die weej heejop krége, ware veur ôs ein stimulans um door te gaon en ut rippertwaar vaerder oet te breide. Dit haet d’r ondermier toe geleid det weej vanaaf toen elk jaor as aafsloeter van “Blariacum-Baeregood”optraeije.

Auk woort ôs op ein gegaeve  augenblik duudelijk det, as weej gaer waat miér woele optraeije, weej ôs neet kôste beperke tot allein maar Bliérickse nummers en zien daorum ôs rippertwaar met Venlose en Limburgse liedjes gaon oetbreide.

Helaas meus trompetis Mark ein keuze make oet zien verschillende muzikale aktitveiten en stopte hae nao de vastelaovend van 2002 beej Wortelestamp.

 

Eine opvolger woord gevonde in de persoën van Henk Schreurs, dae zich naodloos binne de groep wis aan te passe.

In 2003 vônde weej d’n tiëd riëp veur ein demo-cd en op 5 en 6 juli van det jaor makde weej, beej hoëge zomerse temperature, in de Copy Cat studio in Venlo de opnames.

Detzelfde jaor woorte weej auk gevraog door de “Wortelepin” um op de Bliérickse vastelaoves-cd ein dreejtal nummers op te neeme. Dao koste weej uiteraard gèn nae taege zegge en hadde beej studio Jan Theelen ein waal hièl plezeerige opname ervaring.

 

Beej de optreejes rond de vastelaovend 2005 kwame weej tot konklusie det, woele weej verder greuije, weej nog waal wat versterking koste gebroeke.

Ein zangeres, Bernie Billekens en eine trombonis, ald-“Vrijbuiter” Jeu Savelkoul woorte vreej snel bereid gevonde um met ôs mei te gaon doon.

Inmiddels is Jeu nao de vastelaovend van 2008 gestop en hebbe weej in de persoën van Martin van Boekholdt eine waardige opvolger gevonde.

Dus 2009 gaon weej vol vertwrouwe in met ut oetbringe van os nieje c.d. en weer diverse leuke optreejes in ut veuroetzich